Central California Alliance for Health | Nyob boj qab haus huv | LUB PEB HLIS NTUJ 2019

HAUS HUV 6 Ib yam tseem ceeb heev uas koj yuav tau paub txog tus mob ntshav qab zib hom 2—tus kab mob uas ua rau koj muaj piam thaj ntau heev— yog qhov ntawm no: Tej zaum koj twb muaj tus mob tiamsis koj tsis paub tias koj muaj. Cov tsos mob ntawm tus mob ntshav qab zib hom 2 txawj pib maj mam thiab me me tuaj. Thiab ntau tus neeg uas mob hom kab mob no yeej tsis pom muaj cov tsos mob li. Vim li ntawd nws tseem ceeb los paub tej yam uas yuav muaj feem raug tau koj vim tus kab mob. Thiab vim li ntawd koj tus kws kho mob thiaj li yuav kuaj koj seb koj puas muaj feem raug tus mob, txawm tias koj yeej tsis muaj cov tsos mob li. Thaum nws nrhiav tau thiab kho tau tus mob ntshav qab zib hom 2 thaum ntxov, qhov feem pua los muaj tej yammob loj yim huab tsawg zog. Tus mob yog dabtsi thiab leej twg thiaj li muaj feem raug tus mob? Tus mob ntshav qab zib hom 2 yog hom mob ntshav qab zib uas tib neeg nquag mob. Nws pib thaum lub cev muaj teeb meem siv insulin, uas ib yam roj ntsha uas pab piam thaj (uas kuj hu tias piam thaj hauv ntshav) nkag rau hauv lub cev cov keeb ntshav (cells). Thaum cov piam thaj nkag tsis tau cov keeb ntshav, nws cia li nyob hauv cov ntshav lawm xwb. Sijhawm dhau mus, thaum koj muaj piam thaj ntau heev nyob hauv koj cov ntshav nws yuav ua rau lub cev puas tsuaj, ua rau koj muaj feem siab zog los muaj kev mob ntawm lub plawv, lub qhov muag, thiab lub raum, thiab yuav ua kev puas tsuaj rau cov leeg xa xov. Tej co neeg muaj feem siab zog los muaj tus mob ntshav qab zib ntau zog lwm cov neeg. Cov tib neeg uas muaj feem siab zog los muaj tus mob yog cov uas: ●  ● Muaj noob nyoog 45 xyoos thiab laus dua ●  ● Lub cev hnyav dhau lawm lossis rog heev dhau lawm ●  ● Zaum nyob tas li ●  ● Tsev neeg muaj tus mob ntshav qab zib ●  ● Yog haiv neeg Dub African American, haiv neeg Alaska Native, haiv neeg Khab American Indian, haiv neeg Esxias Asian American, haiv neeg Mev Hispanic/Latino, haiv neeg Native Hawaiian or Pacific Islander ●  ● Mob ntshav qab zib thaum ib ce xeeb tub yav tas los lossis yug ib tug mosliab uas muaj 9 phaus lossis hnyav dua Cov tsos mob zoo li cas? Tej co mob uas tshwm sim thiab cov tsos mob ntawm tus mob ntshav qab zib hom 2 muaj nrog rau: ●  ● Nquag mus tso zis heev ●  ● Nqhis dej, nkees lossis tshaib plab heev (txawm tias koj yeej noj mov) ●  ● Pom kev plooj plooj ●  ● Tawv nqaij zoo qeeb qeeb thaum to lossis nroog ●  ● Hnov loog, hnov mob, lossis caus yaum hauv koj ob txhais ko taw lossis tes Yog tias koj muaj cov tsos mob zoo li no, qhia rau koj tus kws kho mob. Nws yuav kuaj koj cov ntshav sej koj puas mob ntshav qab zib. Saib xyuas tus mob no kom zoo tiag tiag Yog tias tus kws kho mob kuaj nrhiav tau tias koj mob ntshav qab zib hom 2, koj yuav tau ua raws li koj tus kws kho mob hais kom koj tswj tau tus mob, uas yuav pab kom qhov feem koj muaj teeb meem tsawg zog. Koj ua tau li ntawd thaum koj noj tej yam zaub mov noj qab haus huv, niaj zaus mus qoj ib ce thiab noj tshuaj, yog tias koj yuav tsum tau noj. Lub Alliance pab them rau cov hoob qhia txog tus mob ntshav qab zib rau txhua tus neeg txawm tias laus los hluas. Koj kawm tau ib co tswvyim los siv kom tswj tau koj tus mob ntshav qab zib. Koj yuav kawm los noj cov zaub mov uas zoo, ua ub ua no heev zog tuaj thiab tswj kom txoj kev ntxov siab qis zog tuaj. Koj kuj yuav kawm los kuaj cov piam thaj hauv ntshav thiab siv tshuaj li cas, yog tias koj yuav tsum tau paub. Cov kev kawm no kuj muaj cov hoob rau koj mus kawm koj ib leeg thiab mus koom nrog ib pab pawg. Cov tswvcuab uas muaj lwm yam kev fajseeb kho mob yuav tau siv tagnrho cov kev pab los ntawm thawj qhov chaw muab kev fajseeb kho mob ua ntej lawv mam siv Alliance cov kev pab. Cov tswvcuab uas mob ntshav qab zib uas hluas tshaj 21 xyoos yuav raug xa mus rau lub Lub Chaw Tshwj Xeeb Tu Xyuas Kev Mob (Special Care Center; SCC, raws li sau hauv lus Askiv) uas raug pom los ntawm California Kev Pab Kho Mob Rau Menyuam Yaus (California Children’s Services; CCS, raws li sau hauv lus Askiv) los pab saib xyuas tus mob ntshav qab zib ntawm ib tug kws kho mob nrog CCS, nyob ntawm qhov haum rau koj. Muab cov ntsiab lus tawm los ntawm: American Diabetes Association; National Institute of Diabetes and Digestive and Kidney Diseases TUS MOB NTSHAV QAB ZIB HOM 2 Paub txog cov tsos mob, paub txog tej yam uas yuav muaj feem raug koj Yog tias koj xav paub ntau zog txog cov kev pab cuam ntawm no, koj hu tau rau Phab Qhia Kev Noj Qab Haus Huv Tus Xov Tooj ntawm (800) 700-3874, ext. 5580 .